Qaybtii 3aad ee
Gumeysi Diid.
Ka dib markii
aan ogaanay in isgumeysigu ahaa xaalad soo martay
caalamka laga bilaabo qarnigii 14aad, oon aragnay in
umadihii la gumeystay ay ka dhiidhiyeen gumeysigii,
dagaal dheer oo boqolaal sano socdayna ay kala hortageen,
ilaa laga soo afjaro isadoonsigii, meelo gaar ah oo
dagaaladii gobanimadoon ay wali ka sii socdaan mooyaane,
qaybtan 3aad waxaan kaga munaaqash-oon doonaa tabaha uu
gumeysiga adeegsado suu u cabudhiyo rabitaanka gobanimo
ee dadweynaha uu gumeysanayo.
Culimada
taariikhda wax ka qora aad ayey uga hadleen arrintan
waxeyna isla qireen in gumeystuhu meel kastaba ha joogee,
midab kastaba ha lahaadee, tabta ay adeegsadaan ay tahay
mid isku mid ah. Kitaab uu qoray general Berfer oo ah nin
Fransiis ah wuxuu ku sheegay sidan: tabaha uu ku bilowdo
gumeysigu waa in guuto ciidan go'an ah ay dhex yimaadaan
dad aanay wada dhalan oo cadaawadi ka dhexeyso.
Dadweynihii dalka lahaa waxey kala hortagayaan ugu
horeynba dagaal bidaa'I ah oo aan qorsheysneyn. Waxaa
dhacda badanaa in dadweynaha dalka u dhashay ay ka
khaldanto awooda ay leeyihiin inta ay la'egtahay oo
markaa ay ku bilaabaan dagaal fool ka fool ah guutadii
iyagoon habeysneyn, oo markaa ay sugnaato awooda guutadaa
soo duushay oy jabshaan dhamaan weerarada lagu soo qaado.'
Arrintan uu sheegay generaalku waa tii soo martay
Ogadeenya qarnigii 18aad markii uu Minilik ciidanka
dameeraha iyo baqlaha wata u soo diri jiray dalka.
Waxaa dhacda buu yidhi general Berfer in muddo ka dib ay
guutadii yeelato dhex gal dadweyne oo folay oo dhan ku
soo dhawaado, halkaan ay ka helaan jawaasiis u adeega.
Muddo ka dib waxey ka dhex sameynayaan buu yidhi ciidan
maxeysato ah dadweynihii iyagoo adeegsanaya handad iyo
maal. Waxaa dhacda markaa in dagaalkii ka dhexeeyay
guutada gumeysiga iyo dadweynihii dalka lahaa uu isku
badalo dagaal sokeeye oo ka dhex dhaca calooshood u
shaqeystihii ay soo urursadeen iyo dadweynihii sharafta
lahaa.
Guutadii oo
mar walba daba socota calooshood u shaqeystihii ay soo
urursadeen ayaa bilaabaya inay ku siqaan dalkii, iyagoo u
qaybinaya dalka laba qaybood. Dhul ay ku magacaabaan dhul
nabadeed oo uu ka talinayo gumeysiga iyo daba-dhilifyadiisa,
iyo dhul dagaal oo ah meelaha ay dadka dagan ay diidaan
sharaf dhaca gumeysiga oo markaa uu ku fasaxo daba-dhilifyadiisa
iyo ciidankiisa daba jooga inay argagax ka wadaan. Kolba
qabiilka ogolaada gumeysiga iyo dabadhilif-nimada umbaana
laga qaadi argagaxaa joogtada ah .. wuxuu qoray general
Berfer in sidaa uu ku balaadho dhulkii gumeysiga.
Hadaan jaleecno waaqica ka jira Ogadenya, waxaad moodaa
Tigree-ga inay sanadadii hore ay bilaabeen inay keenaan
dalka ciidamo meelo fadhiisima ah iska dagay oo aan wax
dhaqdhaqaaq geysanin. Muddo ka dibna waa tii ay bilaabeen
inay xuquuqdii uu dhan ka xanyuubiyaan dadweynaha
Ogadenya iyo shucuubtii kalee inala midka ahaa sida
Oromada kuna amreen inay kabaha u qaadaan ciidanka ama u
diyaar noqdaan dil iyo dhac. Natiijadii maxey noqotay?
Kitaabka generaal Berfer wuxuu qoray in guulaha ay
gaadhaan ciidanka gumeysiga iyo calooshood u shaqeystihii
ay soo urursadeen ay tahay mid aan waarayn haddii
dadweynahaasi la yimaado siyaabaha soo socda;
1. Inuu yeesho urur leh hadaf cad oo dagaalka hogaansha
dhan walba.
2. In kala dambeynta gobanimadoonka iyo tabaha dagaalgal-koodu
noqdo mid ka sareeya tan gumeysiga iyo calooshood u
shaqeystihii ay soo urursadeen.
3. In dadweynaha ay ogolaadaan in aan la heleyn gobanimo
haddii aan loo adkeysan argagixiska gumeystaha iyo
calooshood u shaqeystihii ay soo urursadeen.
4. In la xoojiyo xiriirka jabhadda iyo caalamka dibadda.
Dhageystaha sharafta leh, waxaa maanta dunidoo dhan laga
qiray, in hogaanka toosan ee JWXO ay ku guuleysteen
fulinta dhamaan wixii lagu yiqiin dagaal thawri ah, ka
dib markii la arkay 4tii sanee ugu dambeysay sida uu isku
badalay majaraha dagaalka ka dhex socda Ciidanka Wadaniga
ee Gobanimadoonka Ogadenya iyo Ciidamada cabudhiska iyo
calooshood u shaqeystihii ay soo urursadeen. Saadaasha
natiijada dagaalkana waxaan ku soo qaadi doona qaybta 4aad
ee - Gumeysi la diid -
Mahadsanidin. Kor
Up
Diyaariye Hussein Nuur
radioxoriyo@ogaden.com
Qaybihii hore ee barnaamijka
Gumaysi diid
Qaybtii 1aad
Qaybtii 2aad
Ogaysiis: Waxaan
Ogasiinaynaa dhamaan akhrista yasha Maqaalkan waxaa iska
leh qoraaga kusixiixan isaga ayaad kala xidhiidhi kartaa
wixii fikrad ah.Mahadsanid Maa mulka Qorahay Online
Back to Qorahay
|